گوجرانوالہ (بیورو رپورٹ) گوجرانوالہ میں لاری اڈہ کے قریب ایف آئی اے نے کارروائی کے دوران پنچم تیواری نامی بھارتی شہری کو گرفتار کرلیا۔ ڈپٹی ڈائریکٹرایف آئی اے عامر نواز کے مطابق بھارت کے علاقہ بنارس کے رہائشی پنچم تیواری کی دو ہزار نو میں گوجرانوالہ کے رہائشی کامران سے دبئی میں دوستی ہوئی۔ ملزم دس سال قبل غیر قانونی طریقے سے پاکستان آیا اور کامران کی مدد سے بلال کے نام سے پاکستانی شناختی کارڈ حاصل کیا۔ ملزم نے کامران کی بہن سے شادی بھی کی۔ ڈپٹی ڈائریکٹر ایف آئی اے کا مزید کہنا تھا کہ ملزم کے خلاف مقدمہ درج کرلیا گیا ہے۔ مقدمہ میں کامران سمیت پاکستان میں اس کی معاونت کرنے والے دیگر پانچ افراد بھی نامزد ہیں۔ تحقیقات کی جا رہی ہیں کہ ملزم پاکستان کیوں آیا اور یہاں قیام کے دوران کن سرگرمیوں میں مصروف رہا ہے۔ ایف آئی اے ذرائع کے کہنا ہے کہ نادرا ملازمین کو بھی شامل تفتیش کرنے کا فیصلہ کیا گیا ہے۔
