کراچی (رپورٹ: ذیشان حسین) سروری کلب حیدر آباد کے زیر اہتمام حیدر آباد، حسین آباد میں 29 واں آل پاکستان شوٹنگ بال ٹورنامنٹ جوکہ اللہ وسایو خان بھٹی، ڈاکٹر محمد ابراہیم پٹھان، جاوید اقبال جونیجو کے نام سے منسوب شاندار ایونٹ کا آغاز ہوگیا، سماجی اور کھیلوں کی معروف شخصیت شاہ محمد بھٹی نے پاکستان شوٹنگ بال فیڈریشن کے سیکریٹری سید مدد علی شاہ، آغا صبور پٹھان، غلام حسین پٹھان، فخری عباس، عبدالشکور ڈوڈو، ہدایت اللہ لاشاری، اسماعیل کوسو اور دیگر کے ہمراہ شاندار اور پروقار تقریب میں سینکڑوں کھلاڑیوں اور شائقین کھیل کی موجودگی میں ٹورنامنٹ کا افتتاح کر دیا۔
ٹورنامنٹ کا افتتاحی میچ ایم کے ڈل بدین سندھ اور ٹھیبہ شوٹنگ بال کلب ٹنڈو الہیار کے مابین کھیلا گیا جسے ایم کے ڈل کلب نے جیت لیا۔ ٹورنامنٹ آرگنائزنگ کمیٹی کے اعلامیہ کے مطابق ملک بھر سے ٹیمیں حیدر آباد پہنچ چکی ہیں، ٹورنامنٹ میں ملک بھر کی معروف 70 شوٹنگ بال ٹیمیں مد مقابل ہوں گی 3 روزہ ٹورنامنٹ کے اختتام پر ثقافتی تقریب اور آتش بازی کا شاندار مظاہرہ کیا جائیگا۔
