کراچی، (رپورٹ، ذیشان حسین/اسپورٹس رپورٹر)
سندھ کے وزیر کھیل سردار محمد بخش مہر نے 35ویں نیشنل گیمز کے سلسلے میں کے ایم سی گراؤنڈ میں فٹبال اور پی ایس بی گراؤنڈ میں جاری کراٹے ایونٹ کا افتتاح کیا۔ وزیر کھیل نے دونوں ایونٹس کا تفصیلی جائزہ لیا، کھلاڑیوں سے ملاقات کی اور ان کی کارکردگی کو سراہا۔ اس موقع پر سیکریٹری کھیل منور علی مہیسر، پارلیمانی سیکریٹری صائمہ آغا، سابق سیکریٹری عبدالعلیم لاشاری، چیف انجینئر اسلم مہر سمیت دیگر افسران بھی موجود تھے۔
پاکستان ایئر فورس اور بلوچستان کی ٹیموں کے درمیان ہونے والے فٹبال میچ کے پہلے ہاف میں مقابلہ سخت رہا اور اسکور 0-0 پر برابر رہا۔ دوسری جانب کراٹے ایونٹ میں ملک بھر سے 14 ٹیمیں شریک ہیں، جو اگلے چار روز تک مختلف کیٹیگریز میں مقابلہ کریں گی۔ وزیر کھیل نے کراٹے ایونٹس میں شریک بچوں کو خصوصی طور پر سراہتے ہوئے کہا کہ ایسی سرگرمیاں نوجوانوں میں اعتماد پیدا کرتی ہیں۔
سردار محمد بخش مہر نے کہا کہ سندھ حکومت اور محکمہ کھیل کی جانب سے نیشنل اور انٹرنیشنل کھلاڑیوں کے لیے بہترین انتظامات کو یقینی بنایا گیا ہے۔ انہوں نے کہا کہ نوجوان ملک کا مستقبل ہیں اور ان کے لیے معیاری اسپورٹس سہولیات فراہم کرنا حکومت کی اولین ترجیح ہے۔
