کراچی، (ویب ڈیسک) ایڈیشنل سیشن جج جنوبی/سٹی کورٹ میں رامسوامی میں ڈمپر کی ٹکر سے نوجوان کی ہلاکت کے مقدمے کی سماعت ہوئی۔ واقعے کے بعد ہنگامہ آرائی، فائرنگ اور شہریوں پر تشدد کے الزام میں ڈمپر ایسوسی ایشن کے صدر لیاقت محسود کے خلاف مقدمہ درج ہے۔
مدعی کے وکیل سلمان مجاہد نے عدالت سے استدعا کی کہ ملزم کے خلاف دہشت گردی کی دفعات 6 اور 7 انسدادِ دہشت گردی ایکٹ 1997 کے تحت شامل کی جائیں، کیونکہ ایف آئی آر کے متن کے مطابق یہ کیس اس قانون کی تعریف میں آتا ہے۔ انہوں نے مزید کہا کہ پولیس نے تاحال ملزم کا سی آر او بھی نہیں کروایا۔
پراسیکیوشن نے مدعی وکیل سلمان مجاہد کے اعتراضات کو درست قرار دیتے ہوئے انہیں اپنایا۔ عدالت نے درخواست پر تفتیشی افسر سے رپورٹ طلب کرلی اور اعتراضات پر فیصلہ محفوظ کرلیا جو 13 نومبر کو سنایا جائے گا۔
عدالت نے لیاقت محسود کی عبوری ضمانت میں 13 نومبر تک توسیع کرتے ہوئے سماعت ملتوی کردی۔
