دوحہ، قطر (ویب اسپورٹس)آئی بی ایس ایف ورلڈ اسنوکر چیمپئن شپ کا آغاز قطر کے دارالحکومت دوحہ میں ہو گیا۔ پاکستان کے عالمی چیمپئن محمد آصف نے شاندار کارکردگی کا مظاہرہ کرتے ہوئے اپنا پہلا میچ جیت لیا، تاہم قومی ٹیم کے دوسرے کھلاڑی محمد حسنین کو سخت مقابلے کے بعد شکست کا سامنا کرنا پڑا۔
پاکستان بلیئرڈز اینڈ اسنوکر ایسوسی ایشن کے سیکرٹری جنرل نوید کپاڈیہ کے مطابق، چیمپئن شپ کے ابتدائی مرحلے میں 48 کھلاڑیوں کو 12 گروپوں میں تقسیم کیا گیا ہے، جہاں ہر کھلاڑی تین لیگ میچز کھیلے گا۔ ہر گروپ سے دو بہترین کھلاڑی ناک آؤٹ راؤنڈ کے لیے کوالیفائی کریں گے۔
پہلے روز کھیلے گئے مقابلے میں محمد آصف نے سنگاپور کے چن کینگ کوانگ کو چار، صفر کے بڑے مارجن سے شکست دی۔ ان کے حق میں فریم اسکور 9-89، 44-73، 48-58 اور 13-83 رہا، جبکہ انہوں نے میچ کے دوران 66 اور 77 کے شاندار بریک کھیل کر اپنی فارم ثابت کی۔
دوسری جانب، محمد حسنین ہانگ کانگ کے تام یون فنگ کے خلاف سخت مقابلے کے بعد چار، تین فریم سے ہار گئے۔ فنگ کے حق میں فریم اسکور 73-38، 42-77، 59-52، 26-70، 79-26، 47-80 اور 4-116 رہا۔ میچ کے دوران فاتح کھلاڑی نے ایک شاندار سنچری بریک بھی کھیلا۔
