راولپنڈی، (نوپ نیوز) جنرل ہیڈکوارٹرز (جی ایچ کیو) میں پاکستان کے پہلے چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرات کے اعزاز میں پروقار گارڈ آف آنر کی تقریب منعقد ہوئی۔ آئی ایس پی آر کے مطابق تینوں مسلح افواج کے دستوں نے فیلڈ مارشل عاصم منیر کو روایتی گارڈ آف آنر پیش کیا۔
تقریب میں چیف آف نیول اسٹاف ایڈمرل نوید اشرف، چیف آف ایئر اسٹاف ظہیر احمد بابر سدھو سمیت اعلیٰ عسکری حکام شریک تھے۔ مہمانِ خصوصی کو جنرل سلامی پیش کیے جانے کے بعد فیلڈ مارشل عاصم منیر نے اعزازی دستے کا معائنہ کیا۔
پروقار تقریب میں عسکری قیادت نے فیلڈ مارشل عاصم منیر کی بطور پہلے چیف آف ڈیفنس فورسز تعیناتی کو اہم سنگِ میل قرار دیتے ہوئے ان کی پیشہ ورانہ خدمات کو سراہا۔
