کراچی، (ویب اسپورٹس ) پیپسی نیشنل پی ڈی ٹی20 کرکٹ چیمپئن شپ کا دوسرا مرحلہ آج راولپنڈی میں شروع ہو رہا ہے، جس کا انعقاد پاکستان فزیکل ڈس ایبلیٹی کرکٹ ایسوسی ایشن کے زیرِ انتظام کیا جا رہا ہے۔ اس راؤنڈ میں چار ریجنز راولپنڈی، اسلام آباد، بہاولپور اور پشاور کی فزیکل ڈس ایبلڈ کرکٹ ٹیمیں مدمقابل ہوں گی۔
ایونٹ ڈائریکٹر اور سیکریٹری جنرل امیرالدین انصاری کے مطابق تمام مقابلے ایوب پارک، راولپنڈی میں کھیلے جائیں گے۔ پہلے روز دو میچز شیڈول ہیں: صبح ساڑھے 9 بجے راولپنڈی کا مقابلہ بہاولپور سے ہوگا، جب کہ دوپہر 2 بجے پشاور اور اسلام آباد کی ٹیمیں آمنے سامنے آئیں گی۔
ایونٹ کے اس مرحلے کی فاتح ٹیم فائنل میں جگہ بنائے گی، جو آئندہ ماہ کراچی میں منعقد کیا جائے گا۔
