کراچی, (رپورٹ، ذیشان حسین) سندھ جوڈیشل اکیڈمی میں سندھ انوائرمنٹل پروٹیکشن ایجنسی (سیپا) کے افسران کے لیے 5 روزہ تربیتی پروگرام کا انعقاد کیا گیا جس میں ماحولیاتی قوانین، عدالتی عمل اور مؤثر عملدرآمد پر تفصیلی سیشنز منعقد ہوئے۔
اختتامی تقریب کے مہمانِ خصوصی جسٹس محمد اقبال کلہوڑو نے زور دیا کہ سیپا کو عدالتی نظام کے ساتھ مل کر غیر قانونی صنعتوں کے خلاف کارروائی تیز کرنا ہوگی۔ انہوں نے تجویز دی کہ ماحولیاتی قوانین میں فیکٹریوں کی پیٹرولنگ شامل کی جائے تاکہ بروقت کارروائی ممکن ہو۔
ڈی جی سیپا وقار حسین پھلپوٹو نے کہا کہ یہ تربیت افسران کی صلاحیتوں میں بہتری لائے گی، جس سے ماحولیاتی جرائم کی روک تھام اور سزا کی شرح میں اضافہ ممکن ہوگا۔
پروگرام میں 20 افسران نے شرکت کی، جنہیں ماحولیاتی و عدالتی ماہرین نے رہنمائی فراہم کی۔ آخر میں شرکاء کو شیلڈز اور اسناد دی گئیں، جبکہ افسران نے تربیتی پروگرام کو معلوماتی اور قابلِ عمل قرار دیا۔
