کراچی (رپورٹ: ذیشان حسین) امریکہ سے آئے 17 سالہ حزیفہ ابراہیم نے تیسری قومی جونئیر اسکواش چیمپئین شپ اپنے نام کرلی، پی این روشن خان جہانگیر خان انٹرنیشنل اسکواش کمپلیکس پر منعقدہ 4 لاکھ روپے انعامی رقم کی چیمپئین شپ کے بوائز انڈر19 فائنل میں حزیفہ ابراہیم نے پنجاب کے جنید کو صرف 19 منٹ میں 0-3 سے زیر کیا، 25 سے زائد انٹرنیشنل ٹورنامنٹ جیتنے والے سابق ایشین جونیئر نمبر 1 حزیفہ نے 4-11، 4-11 اور1-11 سے کامیابی پائی۔
پاکستان آرمی کی زینب خان نے کے پی کے کی مہوش کو 0-3 سے مات دے کر گرلز انڈر19 ٹائیٹل جیت لیا، عمیر عارف ( کے پی کے) نے ازان علی( پاکستان آرمی ) کو 1-3 سے زیر کرکے بوائز انڈر 15 ایونٹ جیتا جبکہ نعمان ( پی اے ایف) حزیفہ شاہد کو 1-3 سے قابو کرکے بوائز انڈر 13 کے فاتح رہے، آخر میں مہمان خصوصی عمر سعید نے انعامات تقسیم کیے، اس موقعہ پر سابق عالمی امیچر اسکواش چیمپئین مقصود احمد، رحمت اللہ اور سارہ ملک سمیت دیگر بھی موجود تھے۔
