پولیس سے ایس او پیز کی خلاف ورزی پر جرمانے کا اختیار واپس لیا جائے۔ کورنگی ایسوسی ایشن آف ٹریڈ اینڈ انڈسٹری

کراچی (رپورٹ: ذیشان حسین) کورنگی ایسوسی ایشن آف ٹریڈ اینڈ انڈسٹری (کاٹی) کے صدر سلیم الزماں نے سندھ حکومت کی جانب سے ایس ایچ اوز کو کورونا ایس او پیز کی خلاف ورزی کرنے پر جرمانے کا اختیار دینے کی مزمت کی ہے۔ تشویش کا اظہار کرتے ہوئے کاٹی کے صدر کا کہنا تھا کہ حکومت عوامی مسائل میں کمی کرنے کے بجائے ان کی پریشانی میں اضافہ کر رہی ہے۔عوام پہلے ہی لاک ڈاؤن اور کاروباری بندش کے باعث پریشان ہیں، مارکیٹیں بند ہونے سے اشیائے ضروریہ کی قلت کا سامنا کرنا پڑ رہا ہے اور عوام کو ضروریات زندگی پوری کرنے میں شدید دشواری اٹھا رہے ہیں۔ سلیم الزماں نے کہا کہ ایسی صورتحال میں حکومت کی جانب سے پولیس کو جرمانے کی اجازت سے شہر میں رہنے والوں کا جینا محال ہو جائے گا۔ پولیس میں موجود کرپٹ عناصر نے پہلے ہی لاک ڈاؤن کی آڑ میں رشوت کا بازار گرم کر رکھا ہے جس کا صوبائی وزراء خود بھی اعتراف کر چکے ہیں۔ صدر کاٹی نے کہا کہ اس مشکل وقت میں ملازمت پیشہ طبقہ اور مزدور دو وقت کی روٹی کمانے کیلئے گھروں سے نکلتے ہیں اور سارا دن محنت مزدوری کے بعد گھر کو لوٹتے ہوئے کرپشن زدہ چند پولیس اہلکار لاک ڈاؤن کی خلاف ورزی اور ایس او پیز پر عملدرآمد کا الزام لگا کر رشوت میں ساری کمائی لے جاتے ہیں۔ سلیم الزماں نے کہا کہ حکومت فوری طور پر پولیس سے جرمانے کا اختیار واپس لے، کرپشن کو ختم کرنے کے لئے صرف ڈی سی اور مجسٹریٹ کو ہی کارروائی کا اختیار ہونا چاہیے۔ عوام کی سہولت کیلئے حکومت جرمانے اور سزائیں ختم کرے۔ صدر کاٹی نے کہا کہ تاجر اور صنعتکار پہلے ہی حکومت کو تجویز دے چکے ہیں کہ معاشی سرگرمیوں کو ہر حال میں جاری رہنا چاہیئے، صنعتی اور تجارتی سرگرمیوں کے باعث ہی ہم صنعتوں کو فروغ، برآمدات میں اضافہ اور بے روزگاری میں کمی لاسکتے ہیں۔