کراچی (رپورٹ: ذیشان حسین) پاکستان تحریک انصاف کے مرکزی نائب صدر و سندھ اسمبلی میں پی ٹی آئی کے پارلیمانی لیڈر حلیم عادل شیخ نے اپنے جاری کردہ بیان میں کہا ہے کہ قدرتی آفات کا مقابلہ حکومتیں نہیں قومیں کیا کرتی ہیں۔ بحیثیت قوم ہم سب کو ملکر کرونا وائرس کا مقابلہ کرنا ہوگا۔ سندھ حکومت نے جو بھی اقدامات اٹھائے ہیں انکے ساتھ ملکر کام کرنے کو تیار ہیں۔ سندھ میں ہم بطور اپوزیشن کے سندھ حکومت کے تمام اقدامات کو سپورٹ کر رہے ہیں۔ اس معاملے کو لیکر الزام تراشی کا وقت نہیں ہے۔ ایک دوسرے کی حکومتوں کے خلاف بیان بازی کرنے کے بجائے ملکر کام کرنا ہوگا۔ وفاقی حکومت پہلے دن سے ہی کرونا کے خلاف اقدامات اٹھا رہی۔ ہمارے وفاقی وزیر اس معاملے پر ہر جگہ جارہے ہیں پوری وفاقی حکومت میدان میں ہے۔ کرونا معاملے پر سیاست نہیں ہونی چاہیے۔ پوری قوم کو ملکر اس قدرتی آفت کا مقابلہ کرنا ہوگا۔
