کراچی (رپورٹ: ذیشان حسین) سندھ اور پنجاب میں سورج سوا نیزے پر، محکمہ موسمیات نے مالاکنڈ، ہزارہ، کوہاٹ، پشاور، بنوں میں آندھی اور گرج چمک کے ساتھ بارش کی پیش گوئی کی ہے۔ تفصیلات کے مطابق محکمہ موسمیات کا کہنا ہے کہ آئندہ چوبیس گھنٹوں کے دوران پنجاب، خیبرپختونخوا کے بیشتر میدانی علاقوں، مشرقی بلوچستان اور صوبہ سندھ میں موسم شدید گرم رہیگا جبکہ کراچی میں حبس کی فضا برقرار رہے گی۔محکمہ موسمیات نے آئندہ چوبیس گھنٹوں کے دوران مالاکنڈ، ہزارہ، پشاور، کوہاٹ، بنوں اور کشمیر میں چند مقامات پر آندھی چلنے اور گرج چمک کیساتھ بارش کا امکان بھی ظاہر کیا ہے۔ گزشتہ 24 گھنٹوں کے دوران ملک کے بیشتر علاقوں میں موسم گرم اور خشک جبکہ پنجاب، خیبرپختونخوا کے میدانی علاقوں، مشرقی بلوچستان اور صوبہ سندھ میں موسم شدید گرم رہا۔ آج ریکارڈ کیے گئے گرم ترین مقامات میں جیکب آباد، لاڑکانہ 50، دادو 49، سکھر، موہنجوداڑو، نورپور تھل، رحیم یار خان اور بہاولنگر میں 48 ڈگری سینٹی گریڈ ریکارڈ کیا گیا۔
