ایتھنز/ یونان (رپورٹ: ملک فیصل سمرالہ) انٹرنیشنل فیڈریشن آف فوٹو گرافیک آرٹ کے زیر اہتمام تیرواں عالمی فوٹوگرافی فیسٹول یونان کے دارلحکومت ایتھنز میں منعقد ہوا جس میں دنیا بھر کے فوٹو گرافروں کی تصاویر کی نمائش ہوئی۔ اس فیسٹیول میں فوٹو گرافیک سوسائٹی آف پاکستان کے صدر اور مشہور فوٹوگرافر سید جاوید قاضی (پرائڈ آف پرفارمنس)، اسلام آباد کیمرہ کلب کے صدر ساجد محمود قاضی اور پاکستانی فوٹوگرافر محمد نعیم اعوان کی تصویروں کی نمائش ہوئی۔ اس موقع پر سفارت خانہ پاکستان کے قائم مقام سفیر یاور عباس اور کونسلر امیگریشن صفی اللہ جوکھیو نے بھی تقریب میں شرکت کی۔ قائم مقام سفیر نے اس موقع پر کہا کہ سفارت خانہ پاکستان یونان اس طرح کی فنی سرگرمیوں کی پذیرائی کرتا ہے کیونکہ اس سے دنیا بھر میں پاکستان کا اصل تشخص اجاگر ہوتا ہے۔
