کراچی، (رپورٹ، ذیشان حسین/اسپورٹس رپورٹر) پاکستان ویمنز ٹیم نے شاندار اور تاریخی کارکردگی کا مظاہرہ کرتے ہوئے زمبابوے ویمنز کو دوسرے ایک روزہ میچ میں 206 رنز سے شکست دے کر تین میچوں کی سیریز اپنے نام کرلی۔ نیشنل بینک اسٹیڈیم کراچی میں کھیلے گئے میچ میں پاکستان ویمنز نے اپنی ایک روزہ تاریخ کی سب سے بڑی فتح حاصل کی۔ کپتان فاطمہ ثناء کے پہلے بیٹنگ کے فیصلے کے بعد قومی ٹیم نے 50 اوورز میں 4 وکٹوں کے نقصان پر 343 رنز بنائے، جو ٹیم کا دوسرا بڑا ایک روزہ اسکور ہے۔ اوپنرز صدف شمس اور گل فیروزہ نے پہلی وکٹ کے لیے 189 رنز کی شاندار شراکت قائم کی۔ گل فیروزہ نے 100 رنز جبکہ صدف شمس نے 101 رنز کی عمدہ اننگز کھیلی، جبکہ سدرا امین 89 رنز بنا کر ناٹ آؤٹ رہیں اور اپنے کیریئر میں 22ویں بار 50 سے زائد رنز اسکور کیے۔
ہدف کے تعاقب میں زمبابوے ویمنز کی ٹیم 39 اوورز میں 137 رنز پر آؤٹ ہوگئی۔ رنیا رارو پاسیپا نوڈیا 33 رنز کے ساتھ ناٹ آؤٹ رہیں جبکہ کیلِس ندھلووو نے 32 رنز بنائے۔ پاکستان کی جانب سے کپتان فاطمہ ثناء نے شاندار بولنگ کرتے ہوئے 3 وکٹیں حاصل کیں، جبکہ مومنہ ریاست، رامین شمیم اور سیدہ اروب شاہ نے دو، دو کھلاڑیوں کو آؤٹ کیا۔ اس کامیابی کے ساتھ پاکستان ویمنز نے آئی سی سی ویمنز چیمپئن شپ 2025–29 میں بھی اہم چھ پوائنٹس حاصل کرلیے۔
