فیصل آباد، (ویب اسپورٹس) قوئنٹن ڈی کوک کی شاندار سنچری کی بدولت جنوبی افریقہ نے دوسرے ون ڈے میں پاکستان کو آٹھ وکٹوں سے شکست دے کر تین میچوں کی سیریز ایک، ایک سے برابر کر دی۔ جمعرات کی شام اقبال اسٹیڈیم فیصل آباد میں کھیلے گئے اس میچ میں مہمان ٹیم نے 270 رنز کا ہدف صرف 40.1 اوورز میں حاصل کر لیا۔ ڈی کوک نے 119 گیندوں پر ناقابلِ شکست 123 رنز بنائے، جن میں آٹھ چوکے اور سات چھکے شامل تھے، جبکہ ٹونی ڈے زورزی نے 63 گیندوں پر 76 رنز کی جارحانہ اننگز کھیل کر ان کا بھرپور ساتھ دیا۔ اوپنر لوہان-ڈرے پریٹوریئس نے بھی 40 گیندوں پر 46 رنز بنا کر ٹیم کے مجموعے میں اہم کردار ادا کیا۔
اس سے قبل پاکستان نے ٹاس جیت کر بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 269 رنز بنائے۔ صائم ایوب نے 66 گیندوں پر 53، محمد نواز نے 59 گیندوں پر 59 جبکہ سلمان علی آغا نے 106 گیندوں پر 69 رنز کی ذمہ دارانہ اننگز کھیلی۔ ابتدائی وکٹیں جلد گرنے کے بعد صائم اور آغا نے چوتھی وکٹ پر 92 رنز کی قیمتی شراکت قائم کی، جس کے بعد محمد نواز کی دھواں دار بیٹنگ اور فہیم اشرف کے 18 گیندوں پر 28 رنز کی برق رفتار اننگز نے ٹیم کو قابلِ احترام مجموعے تک پہنچایا۔
جنوبی افریقہ کی جانب سے نانڈرے برگر نے شاندار بولنگ کا مظاہرہ کرتے ہوئے 46 رنز کے عوض چار وکٹیں حاصل کیں۔ لیگ اسپنر نقابایومزی پیٹر نے تین وکٹیں 55 رنز دے کر حاصل کیں جبکہ فاسٹ بولر کاربن بوش نے دو کھلاڑیوں کو پویلین بھیجا۔ پاکستان کی جانب سے فہیم اشرف اور محمد وسیم جونیئر ایک، ایک وکٹ حاصل کر سکے۔ دونوں ٹیموں کے درمیان فیصلہ کن تیسرا ون ڈے ہفتہ 8 نومبر کو کھیلا جائے گا۔
