کراچی، (رپورٹ، ذیشان حسین)/صومالیہ کے ساحل پر قزاقوں کے قبضے میں موجود آئل ٹینکر ایم ٹی آنر 25 کی بازیابی کے لیے پنٹ لینڈ میری ٹائم پولیس فورس نے آپریشن کیا۔ کارروائی کے دوران فائرنگ کے نتیجے میں 3 پاکستانیوں سمیت 5 یرغمالی جان کی بازی ہار گئے جبکہ سیکیورٹی فورسز نے ٹینکر کو قزاقوں کے قبضے سے چھڑا لیا۔
جاں بحق پاکستانی شہریوں میں سیکنڈ آفیسر کاشف عمر، تھرڈ انجینئر محمود انصاری اور آئلر رفیع اللہ خان شامل ہیں دیگر ہلاک افراد میں بھارت سے تعلق رکھنے والا کریو ممبر تنویر اور میانمار کا چیف انجینئر بھی شامل ہے کارروائی کے دوران فورسز نے ٹینکر پر موجود 9 مبینہ قزاقوں کو گرفتار کرلیا۔ صومالیہ ٹائمز کے مطابق آئل ٹینکر 21 اپریل سے قزاقوں کے قبضے میں تھا اور اسے بندریلا کے ساحل کے قریب سے بازیاب کرایا گیا۔
