لاہور، (ویب اسپورٹس) قذافی اسٹیڈیم لاہور میں کھیلے گئے دوسرے ون ڈے میچ میں جنوبی افریقہ ویمنز نے پاکستان ویمنز کو ڈک ورتھ-لیوس-اسٹرن (ڈی ایل ایس) کے تحت 25 رنز سے شکست دے کر تین میچوں کی سیریز میں فیصلہ کن برتری حاصل کرلی۔
جنوبی افریقہ کی اوپنرز تزمین برِٹس اور لورا وولوارڈٹ نے شاندار بلے بازی کا مظاہرہ کرتے ہوئے اپنی ٹیم کو 46 اوورز میں 292 رنز پر پہنچایا۔ بارش کے سبب ہدف 313 رنز مقرر کیا گیا۔ برِٹس 141 گیندوں پر ناقابلِ شکست 171 رنز بنا کر نمایاں رہیں جبکہ وولوارڈٹ نے 129 گیندوں پر سنچری اسکور کی۔ دونوں نے 260 رنز کی ریکارڈ اوپننگ شراکت قائم کی، جو جنوبی افریقہ ویمنز کی ون ڈے تاریخ میں سب سے بڑی پارٹنرشپ ہے۔
ہدف کے تعاقب میں پاکستان کا آغاز مایوس کن رہا اور مونیبہ علی صرف ایک رن بنا کر ایل بی ڈبلیو ہوگئیں۔ اس موقع پر اوپنر سدرہ امین اور اوما ئمہ سہیل نے اننگز کو سہارا دیا۔ اوما ئمہ نے 43 رنز کی جارحانہ باری کھیلی جبکہ سدرہ نے شاندار کھیل پیش کرتے ہوئے مسلسل دوسری اور مجموعی طور پر چھٹی سنچری اسکور کی۔ ناتالیہ پرویز نے بھی 60 گیندوں پر 73 رنز بنا کر بھرپور ساتھ دیا۔ دونوں نے 146 رنز کی زبردست پارٹنرشپ قائم کی جس نے میچ کو سنسنی خیز بنایا۔
پاکستان کو آخری آٹھ اوورز میں 66 رنز درکار تھے مگر یکے بعد دیگرے وکٹیں گرنے سے ٹیم دباؤ میں آگئی۔ کپتان فاطمہ ثنا (5) اور پھر ناتالیہ پرویز کی قیمتی وکٹ گرنے کے بعد پاکستان کی امیدیں دم توڑ گئیں۔ آخر کار میزبان ٹیم 44.4 اوورز میں 287 رنز پر ڈھیر ہوگئی۔
جنوبی افریقہ کی جانب سے ماساباتا کلا س اور دیگر گیند بازوں نے اہم مواقع پر وکٹیں حاصل کیں، جبکہ پاکستان کی جانب سے سدرہ امین 122 اور ناتالیہ پرویز 73 رنز کے ساتھ نمایاں رہیں۔
اس فتح کے ساتھ ہی جنوبی افریقہ ویمنز نے سیریز میں دو۔صفر کی فیصلہ کن برتری حاصل کرلی ہے۔
