کراچی، (رپورٹ، ذیشان حسین) ایڈیشنل آئی جی کراچی جاوید عالم اوڈھو سے کراچی یونین آف جرنلسٹس (دستور) کے 12 رکنی وفد نے ملاقات کی، جس کی قیادت صدر نصراللہ چوہدری اور سیکرٹری ریحان خان چشتی نے کی۔ ملاقات میں صحافیوں کو درپیش مسائل اور ان کے تحفظ کے حوالے سے تفصیلی بات چیت ہوئی۔
وفد نے کراچی پولیس چیف کو صحافیوں کے خلاف وارداتوں کی فہرست پیش کی، جس پر ایڈیشنل آئی جی نے فوری توجہ دیتے ہوئے صحافیوں کے مسائل کے حل کے لیے خصوصی کمیٹی بنانے کا اعلان کیا۔ اس اقدام کو صحافتی حلقوں میں ایک مثبت پیش رفت قرار دیا جا رہا ہے۔
ملاقات کے دوران کراچی پولیس اور صحافیوں کے درمیان مشترکہ سیمینارز منعقد کرنے پر بھی اتفاق کیا گیا تاکہ باہمی روابط مزید مستحکم ہوں اور مسائل کو مکالمے کے ذریعے حل کیا جا سکے۔
یہ ملاقات نہ صرف صحافیوں کے دیرینہ مطالبات کی جانب ایک قدم ہے بلکہ کراچی پولیس اور صحافتی تنظیموں کے درمیان تعاون کے نئے دروازے کھلنے کی نوید بھی ہے۔
