کراچی, (رپورٹ، ذیشان حسین) میئر کراچی اور بلاول بھٹو زرداری کے ترجمان بیرسٹر مرتضی وہاب نے سندھ اسمبلی میں اپوزیشن لیڈر علی خورشیدی کی پریس کانفرنس پر ردعمل دیتے ہوئے انکی پریس کانفرنس کا مضحکہ خیز قرار دیا ہے اور کہا ہے کہ ایم کیو ایم والے مان لیں کہ وہ بدحواسی کا شکار ہیں اپنی پارٹی میں چیئرمین شپ کی لڑائی پر پریشانی کا شکار ہوکر پیپلزپارٹی کی قیادت اور سندھ حکومت کے خلاف ہرزہ سرائی کررہے ہیں انہوں نے کہا کہ کراچی میں تین دہائیوں کے ظلم و ستم، قتل و غارتگری پر مبنی اندوہناک فلم کے بارے میں کراچی کے شہری بہت اچھی طرح جانتے ہیں شہری یہ بھی جانتے ہیں کہ اس فلم کے ولن سے لیکر تمام گھناؤنے کرداروں کے چہرے کراچی والوں کو شناسا ہیں کراچی کے شہری فیکٹریوں میں معصوم نوجوانوں کو زندہ جلانے والوں کو بھی اچھی طرح جانتے ہیں۔ بیرسٹر مرتضی وہاب نے کہا کہ علی خورشیدی اچھی طرح جانتے ہیں کہ کراچی میں یہ بدترین خوف کا بت بلاول بھٹو زرداری اور انکی جماعت نے ختم کیا ہے الحمداللہ اب کراچی میں بوری بند لاشوں، بھتہ خوری، ماؤں بہنوں کی عصمت دری کے سیاہ دور کا خاتمہ ہوچکا ہے کراچی کے غیور عوام نے بوری بند لاشوں اور دھونس دھمکی کی سیاست کرنے والوں کو مسترد کردیا ہے اب بلاول بھٹو زرداری کی قیادت میں ترقی کا سفر جاری و ساری ہے۔ بیرسٹر مرتضی وہاب کا کہنا تھا کہ کراچی کے شہری اپنے بنیادی مسائل کے حل کے لیے پیپلزپارٹی کے ساتھ ہیں اور رہیں گے علی خورشیدی اپنی جماعت کے ماضی پر زرا لب کشائی کی ہمت کریں اور جناب کی دروغ گوئی سے ہم ترقیاتی کاموں کو نہیں روکیں گے آپ چاہے کتنا بھی زور لگا لیں ہم شہریوں کے تمام مسائل حل کرکے دم لیں گے موصوف اچھی طرح جانتے ہیں کہ ملکی مسائل کا حل بھی صرف بلاول بھٹو زرداری اور انکی جماعت کے پاس ہے۔
Home / اہم خبریں / ایم کیو ایم والے مان لیں کہ وہ بدحواسی کا شکار ہیں، علی خورشیدی اچھی طرح جانتے ہیں کہ کراچی میں بدترین خوف کا بت بلاول بھٹو زرداری اور انکی جماعت نے ختم کیا۔ مرتضی وہاب