کراچی، (رپورٹ، ذیشان حسین/اسپورٹس رپورٹر) امریکن بزنس کلب نیشنل جونیئر اسکواش چیمپئن شپ کے پری کوارٹر فائنلز میں سندھ کی ویشنوی نے گرلز انڈر 15 کی ٹاپ سیڈ کھلاڑی نمرا بتول کو شکست دے کر بڑا اپ سیٹ کر دیا اور کوارٹر فائنل کے لیے کوالیفائی کر لیا۔ سندھ کے عدنان زمان اور وائلڈ کارڈ انٹری رکھنے والے عبداللہ نواز نے بھی بوائز انڈر 19 کی کیٹیگری میں ٹاپ ایٹ مرحلے میں جگہ بنالی۔
سندھ اسکواش ایسوسی ایشن کے زیرِ اہتمام پی ایس ایف جہانگیر خان اسکواش کمپلیکس میں جاری آٹھ لاکھ روپے انعامی رقم کی حامل پہلی امریکن بزنس کلب نیشنل جونیئر اسکواش چیمپئن شپ کے دوران مختلف کیٹیگریز کے دلچسپ مقابلے ہوئے۔
بوائز انڈر 19 میں کے پی کے عبیداللہ، پنجاب کے محمد نائل علی، عثمان طاہر اور عبداللہ ندیم سمیت سندھ کے عدنان زمان نے اپنے اپنے حریفوں کو شکست دی گرلز انڈر 15 میں عائشہ شہباز، صفا احمد، ملیحہ شاہ، فجر نور، سہیم فاطمہ، سعدیہ ظہور خان اور دامیہ خان نے بھی کامیابی حاصل کر کے اگلے مرحلے میں جگہ بنالی۔
بوائز انڈر 13 اور انڈر 11 کیٹیگریز میں بھی سخت مقابلے دیکھنے میں آئے، جہاں سندھ، پنجاب، کے پی کے اور پی اے ایف کے کھلاڑیوں نے شاندار کھیل کا مظاہرہ کرتے ہوئے کوارٹر فائنلز کے لیے کوالیفائی کیا۔ چیمپئن شپ میں ملک بھر سے 208 انٹریز موصول ہوئیں، جبکہ صوبائی و محکمانہ ٹیمیں بھرپور انداز میں شریک ہیں۔
