مانسہرہ (رپورٹ: عتیق سلیمانی) کم مالیت کے اسٹام پیپر بدستور ناپید عوام کو شدید مشکلات کا سامنا کرنا پڑ رہا ہے۔ تفصیلات کے مطابق گزشتہ کئی ہفتوں سے ضلع بھر میں ایک سو روپے والے اسٹام پیپر نہیں مل رہے۔ اور جن اسٹام فروشوں کے پاس ہیں بھی تو من مانے ریٹ پر فروخت کر رہے ہیں۔ سکول کالجز کے داخلوں اور ڈومیسائل کے لیے بیان حلفی ایک سو روپے والے اسٹام پیپر کی جمع کی جاتی ہے۔ صوبائی حکومت نے طلباء کی پریشانی کو مدنظر رکھتے ہوئے کالجز انتظامیہ کو ہدایات جاری کی ہیں کہ داخلے کے لیے اسٹام پیپر بیان حلفی کی شرط ختم کی جائے جسکے بعد کالجز انتظامیہ بیان حلفی کے بغیر ہی داخلہ فارم وصول کر رہے ہیں۔ مگر ڈومیسائل کے لیے بیان حلفی کے لیے ابھی بھی اسٹام پیپر نہیں مل رہے۔ عوامی حلقوں نے تشویش کا اظہار کرتے ہوئے کہا ہے کہ بیان حلفی اور دیگر اہم دستاویزات کے لیے کم مالیت کے اسٹام پیپر استعمال ہوتے ہیں جو اس وقت ناپید ہیں جسکی وجہ سے شدید ذہنی کوفت میں مبتلاء ہیں۔ دوسری جانب اسٹام فروش بھی پریشان بیٹھے ہیں انکا کہنا ہے کہ کم مالیت کے اسٹام پیر نہ ہونے کی وجہ سے کام بلکل ٹھپ ہے۔
