کراچی (نوپ نیوز) ڈائریکٹر جنرل اے ایس ایف میجر جنرل علی عباس حیدر نے کہا ہے کہ لاہور کے بعد کراچی اور دیگر ایئرپورٹس پر جدید ترین سیکیورٹی سسٹم کی تنصیب کے لئے کارروائی کا آغاز کر دیا گیا ہے، سسٹم کی تنصیب کے لئے سول ایوی ایشن اتھارٹی کنٹریکٹ جاری کر رہی ہے، اس کے علاوہ محفوظ ہوائی سفر کے لئے ایئر پورٹس کی سیکیورٹی پر مبنی جدید ہتھیاروں کا حصول بھی جاری ہے، اے ایس ایف سٹی کو ایک سال میں الاٹیز کے لئے رہائش کے قابل بنا دیں گے جبکہ موجودہ اراضی پر جلد ہی فیز ٹو کا اعلان بھی کریں گے۔ ان خیالات کا اظہار انہوں نے ڈی جی اے ایس ایف کے ہاؤسنگ فاؤنڈیشن کے پلاٹس اور بنگلوز کی قرعہ اندازی کی تقریب سے بطور مہمان خصو صی خطاب کرتے ہوئے کیا۔ اس موقع پر میڈیا سے بات چیت کرتے ہوئے میجر جنرل علی عباس حیدر نے کہا کہ اے ایس ایف ہاؤسنگ فاؤنڈیشن کے اس منصوبے میں عام رہائشی سکیموں کی نسبت دو تہائی سے زائد اراضی کو اوپن رکھا گیا ہے۔
