کوالالمپور (رپورٹ: عامر وقاص چوہدری/ نويد اسلم) یوم پاکستان کے موقع پر پاکستان ہائی کمیشن کوالالمپور ملائیشیا میں پرچم کشائی کی تقریب انتہائی سادگی کے ساتھ منائی گئی۔ تقریب کا آغاز تلاوت قرآن مجید سے کیا گیا جس کے بعد پاکستان کا قومی ترانہ پڑھا گیا۔ پاکستانی ہائی کمشنر آمنہ بلوچ نے صدر پاکستان ڈاکٹر عارف علوی اور وزیر اعظم پاکستان عمران خان کے یوم پاکستان کے حوالے سے خصوصی پیغامات پڑھ کر سناۓ، جس کے بعد پاکستانی ہائی کمشنر آمنہ بلوچ نے بابائے قوم قائد اعظم محمد علی جناح اور بانیان پاکستان کے رہنماؤں کو زبردست خراج عقیدت پیش کیا جنہوں نے قیام پاکستان کے لئے انتھک محنت اور لگن سے پاکستان بنانے کی راہ ہموار کی۔ اس موقع پر مملکت خداداد پاکستان کی خوشحالی، ترقی اور سلامتی کے لئے دعا کی گئی اور بھارت کے زیر تسلط مقبوضہ جموں و کشمیر کے مظلوم عوام کے حق میں خصوصی دعا کی گئی۔ تقریب کے آخر میں عالمی وباء کورونا وائرس سے نجات اور تحفظ کے لئے پوری انسانیت کی صحت اور تندرستی کے لئے خصوصی دعا کی گئی۔
