سیالکوٹ (رپورٹ: سیدہ نزہت شہناز) بھارت نے دریائے چناب کا پانی مقبوضہ کشمیر کے بگلیہار ڈیم پر روک لیا، پانی کی آمد کم ہوکر صرف دس ہزار آٹھ سو چوراسی کیوسک رہ گئی۔ 1960 کے سندھ طاس معاہدہ کی خلاف ورزی کرکے بھارت نے دریائے چناب کا پانی روکا۔ پانی کی کمی کی وجہ سے دریائے چناب کا ستانوے فیصد حصہ مکمل خشک ہوگیا، نہر مرالہ، راوی لنک مکمل بند، نہر اپر چناب کے پانی کا بہاؤ چھ ہزار آٹھ سو کیوسک رہ گیا۔ ڈپٹی کمشنر عمر شیر دل نے بتایا کہ سندھ طاس معاہدہ کے تحت بھارت دریائے چناب میں ہر لمحہ 55 ہزار کیوسک پانی چھوڑنے کا پابند ہے۔ پانی کی کمی کی وجہ سے سیالکوٹ، پسرور، سمبڑیال، ڈسکہ اور گوجرانوالہ و دیگر اضلاع کی کاشت شدہ ہزاروں ایکٹر زرعی اراضی کی فصلوں کو نقصان پہنچنے کا اندیشہ ہے۔
