کراچی (رپورٹ: ذیشان حسین) ثانوی تعلیمی بورڈ کراچی کے چیئرمین پروفیسر ڈاکٹر سعید الدین نے نہم جماعت سائنس و جنرل گروپ ریگولر اور پرائیویٹ کے سالانہ امتحانات سال 2019 کے نتائج کا اعلان کر دیا۔ چیئرمین میٹرک بورڈ پروفیسر ڈاکٹر سعید الدین نے کہا کہ نتائج کو بہتر اور شفاف بنانے کیلیے ہر ممکن حد تک کوشش کی گئی ہے۔ یہ نتائج ایس ایم ایس سروس
bsek
اسپیس رول نمبر 8583 پر بھیج کر یا پھر ویب سائٹ
www.bsek.edu.pk
پر بھی دیکھے جا سکتے ہیں۔ تفصیلات کے مطابق سائنس گروپ میں ایک لاکھ 59 ہزار100 امیدواروں نے رجسٹریشن کرائی جبکہ ایک لاکھ 54 ہزار 991 امیدوار امتحانات میں شریک ہوئے۔ ان میں سے 4 ہزار 109 امیدوار غیر حاضر رہے۔ اس طرح 5 پرچوں میں 97 ہزار 68، چار پرچوں میں 30 ہزار 331، تین پرچوں میں 15 ہزار 743، دو پرچوں میں 7 ہزار 541 جبکہ ایک پرچے میں 3 ہزار 797 امیدواروں نے کامیابی حاصل کی۔ اس طرح 5 پرچوں میں پاس ہونے والوں کی شرح کا تناسب 62.63 فیصد رہا۔ اسی طرح جنرل گروپ ریگولر میں 14ہزار 301 امیدواروں نے رجسٹریشن کرائی جبکہ 13 ہزار 714 امیدوار امتحانات میں شریک جبکہ 587 امیدوار غیر حاضر رہے ۔ جنرل گروپ ریگولر میں پانچ پرچوں میں 7 ہزار 348، چار پرچوں میں 2 ہزار 634، تین پرچوں میں 1 ہزار 373، دو پرچوں میں 838 اور ایک پرچے میں 533 امیدواروں نے کامیابی حاصل کی، اس طرح پانچوں پرچوں میں کامیابی کا تناسب 53.58 فیصد رہا۔
