ہیوسٹن (ویب ڈیسک) ہیوسٹن میں علیحدگی پسند سکھ تنظیم اور کشمیریوں نے مودی کے خلاف زبردست مظاہرہ کیا ہے۔ تفصیلات کے مطابق مقبوضہ کشمیر کی صورتحال کو اجاگر کرنے اور بھارتی وزیراعظم نریندر مودی کے خلاف امریکا کے مختلف شہروں خصوصاً ہوسٹن میں احتجاجی ریلیاں نکالیں اور مظاہرے کئے گئے، مظاہرے میں بڑی تعداد میں کشمیری، سکھ، بھارتی مسلمان، پاکستانی اور خواتین شریک تھیں۔ مظاہرے کا اہتمام این آر جی اسٹیڈیم کے باہر کیا گیا تھا، اس موقع پر مظاہرین کی ٹی شرٹس اور کیپس پر بھارتی مظالم کے خلاف نعرے درج تھے جبکہ بینرز پر مقبوضہ کشمیر کو آزاد کرو کے نعرے اور نازی مودی کے نعرے بھی درج تھے۔ اس موقع پر سکھ برادری کی جانب سے مودی کے خلاف بھرپور احتجاج کیا گیا، سکھ کمیونٹی کی جانب سے مودی واپس جاؤ اور مودی دہشت گرد ہے کے واشگاف نعرے لگائے گئے۔ واضح رہے کہ مودی کے خلاف احتجاج کی تیاریاں کئی روز سے جاری تھیں، عظیم الشان مظاہرے میں سکھ رہنما کی جانب سے آزادی ٹرک بھی متعارف کرایا گیا، یہ ٹرک پچاس گاڑیوں پر مشتمل تھا، جس پر خالصتان تحریک کے حق میں نعرے درج تھے۔
