ایتھنز/ یونان (رپورٹ: ملک فیصل سمرالہ) آج سفارت خانہ پاکستان یونان کی ایک کونسلر ٹیم نے کونسلر امیگریشن صفی اللہ جوکھیو کی قیادت میں ایٹیکا پولیس ہیڈ کوارٹر کا دورہ کیا۔ کونسلر امیگریشن نے ایلینز پولیس ایٹیکا کے چیف کونسٹاڈینوس سورمیلیس سے ملاقات کی اور امیگریشن کے امور پر تبادلہ خیال کیا۔ سفارت خانہ کی ٹیم نے ایٹیکا پولیس کے ہیڈ کوارٹر کی جیل میں پاکستانی قیدیوں تک مندرجہ ذیل اشیاء پہنچائیں، رمضان کیلینڈر، کپڑے، ٹوتھ پیسٹ، برش، صابن، ڈیٹرجنٹ پاؤڈر اور کھانے پینے کا سامان جسمیں روح افزاء، کیک رسک، کھجوریں اور سموسے وغیرہ۔ رمضان کے آئندہ آنے والے دنوں میں سفارت خانہ کی ٹیمیں مختلف کیمپس اور جیلوں کا دورہ کر کے قیدیوں میں سامان تقسیم کرے گی۔
