راولپنڈی (بیورو رپورٹ) بلوچستان کے علاقے تربت میں سیکیورٹی فورسز کی کارروائی میں 4 دہشت گرد ہلاک جبکہ 6 سیکیورٹی اہلکاروں نے جام شہادت نوش کیا۔ پاک فوج کے شعبہ تعلقات عامہ کے مطابق سیکیورٹی فورسز نے بلوچستان کے ضلع کیچ میں تربت کے علاقے بلیدہ کے نزدیک واکئی ایریا میں خفیہ اطلاع پر آپریشن کیا گیا۔ آئی ایس پی آر کا کہنا ہے کہ خفیہ اطلاع پر یہ آپریشن دہشت گردوں کے ٹھکانے پر کیا گیا جہاں فائرنگ کے تبادلے میں 4 دہشت گرد ہلاک ہوئے۔ آئی ایس پی آر نے مزید بتایا کہ دہشت گردوں نے آئی ای ڈیز سے سیکیورٹی فورسز کی گاڑی کو نشانہ بنایا جس کے نتیجے میں 6 سیکیورٹی اہلکاروں نے جام شہادت نوش کیا جام شہادت نوش کرنے والوں میں نائب صوبیدار گل شہادت تعلق کرک، نائک لال خان تعلق لکی مروت، نائک سجاد تعلق لودھراں، نائک نواز تعلق تونسہ شریف، سپاہی انور تعلق کرک اور سپاہی سجاد تعلق سیالکوٹ سے ہے۔
