کراچی، (اسٹاف رپورٹر) ٹریفک کے بہتر نظام کرایوں میں شفافیت اور شہریوں کو محفوظ سفری سہولت فراہم کرنے کے لیے رکشوں سے متعلق نئے قواعد متعارف کرانے کی تجویز سامنے آگئی ہے کراچی میں مجوزہ منصوبے کے تحت شہر کی سڑکوں پر صرف وہی رکشے چلانے کی اجازت ہوگی جن میں منظور شدہ کرایہ میٹر نصب ہوگا۔
مجوزہ پالیسی کے مطابق رکشہ ڈرائیور مقررہ کرایہ نامے کے پابند ہوں گے جبکہ گاڑیوں کی فٹنس، حفاظتی معیار اور ٹریفک قوانین پر بھی سختی سے عمل درآمد کرایا جائے گا۔ حکام کا کہنا ہے کہ ان اقدامات کا مقصد مسافروں کا استحصال روکنا، ٹریفک کی روانی بہتر بنانا اور شہریوں کو محفوظ اور منظم سفری سہولت فراہم کرنا ہے۔ تاہم اس تجویز پر عمل درآمد سے قبل متعلقہ حکام کی جانب سے باضابطہ نوٹیفکیشن اور حتمی پالیسی جاری کی جائے گی۔
