کراچی، (رپورٹ، ذیشان حسین) افغانستان وہیل چیئر کرکٹ ٹیم اپنے تاریخی دورۂ پاکستان کے سلسلے میں کراچی پہنچ گئی۔ ایئرپورٹ پر پاکستان وہیل چیئر کرکٹ کونسل کی صدر رخسانہ راجپوت اور قومی ٹیم کے کپتان محمد ذیشان نے مہمان ٹیم کا پرتپاک استقبال کیا۔
مہمان کھلاڑیوں کو سخت سیکورٹی حصار میں ہوٹل منتقل کیا گیا۔ اس موقع پر اعلان کیا گیا کہ پاک افغان ٹی ٹوئنٹی سیریز کی ٹرافی آج عوام کے سامنے رونمائی کرے گی، جبکہ افغان ٹیم کل پہلی بار پاکستان کے میدانوں میں ایکشن میں دکھائی دے گی۔
صدر کونسل رخسانہ راجپوت نے کہا کہ افغان وہیل چیئر کرکٹ ٹیم پہلی مرتبہ پاکستان کا دورہ کر رہی ہے، جو دونوں ممالک کے درمیان کھیلوں کے تعلقات کو فروغ دینے میں سنگ میل ثابت ہوگا۔ انہوں نے مزید کہا کہ ایشیا کپ سے قبل پاک افغان سیریز کا انعقاد نہایت اہمیت کا حامل ہے اور کھلاڑیوں کو قیمتی تجربہ فراہم کرے گا۔
