اسلامآباد, ( اسپورٹس رپورٹر) پاکستان اسپورٹس بورڈ (PSB) نے پاکستان ویٹ لفٹنگ فیڈریشن سے وابستہ متعدد کھلاڑیوں اور عہدیداروں پر اینٹی ڈوپنگ قوانین کی سنگین خلاف ورزیوں کے باعث پابندیاں عائد کر دی ہیں یہ کارروائی عالمی اینٹی ڈوپنگ ایجنسی (WADA) اور انٹرنیشنل ٹیسٹنگ ایجنسی (ITA) کی جانب سے "آپریشن جاسمین” کے تحت کی گئی تحقیقات کے بعد عمل میں آئی۔
ترجمان پی ایس بی کے مطابق جن افراد پر پابندی عائد کی گئی ہے ان میں شرجیل بٹ، عبد الرحمن، غلام مصطفیٰ، فرحان مجید، سابق صدر حافظ عمران بٹ، کوچ عرفان بٹ اور وقاص اکبر شامل ہیں کھلاڑیوں اور کوچز پر ان کی بین الاقوامی پابندیوں کی مکمل مدت تک پابندی برقرار رہے گی، جب کہ مذکورہ عہدیداران کو تمام کھیلوں سے متعلق سرگرمیوں سے چار سال کے لیے معطل کر دیا گیا ہے۔
یہ فیصلہ فوری طور پر نافذالعمل ہے اور 2021 سے شروع ہونے والے ان واقعات کے بعد سامنے آیا ہے جن میں متعدد کھلاڑیوں نے ڈوپ ٹیسٹ سے بچنے کی کوشش کی یا ان کے ٹیسٹ مثبت آئے۔ پی ایس بی کے مطابق، اس فیصلے کی نقول آئی او سی، او سی اے، آئی ڈبلیو ایف، واڈا، آئی ٹی اے، سی اے ایس اور پاکستان اولمپک ایسوسی ایشن سمیت تمام متعلقہ اداروں کو ارسال کر دی گئی ہیں۔
