کراچی، (رپورٹ، ذیشان حسین) جنوبی افریقہ ویمنز انڈر 19 کرکٹ ٹیم اپنی تاریخ میں پہلی بار پاکستان کا دورہ کرے گی، جہاں وہ میزبان پاکستان ویمنز انڈر 19 ٹیم کے خلاف پانچ ٹی ٹوئنٹی میچوں کی سیریز میں حصہ لے گی۔ یہ سیریز 14 سے 24 جولائی تک کراچی کے نیشنل بینک سٹیڈیم میں منعقد ہوگی۔
دورے کے شیڈول کے مطابق جنوبی افریقہ ویمنز انڈر 19 ٹیم 10 جولائی کو کراچی پہنچے گی، جبکہ دونوں ٹیمیں 11 سے 13 جولائی تک نیشنل بینک سٹیڈیم میں تربیتی سیشنز میں حصہ لیں گی تاکہ سیریز کے لیے بھرپور تیاری کی جا سکے۔
سیریز کا پہلا ٹی ٹوئنٹی میچ 14 جولائی، دوسرا 17 جولائی، تیسرا 19 جولائی، چوتھا 22 جولائی اور پانچواں و آخری میچ 24 جولائی کو کھیلا جائے گا۔ تمام میچز نیشنل بینک سٹیڈیم کراچی میں منعقد ہوں گے۔
یہ سیریز دونوں ٹیموں کے لیے آئندہ اے سی سی ویمنز انڈر 19 ٹی ٹوئنٹی ایشیا کپ اور آئی سی سی ویمنز انڈر 19 ٹی ٹوئنٹی ورلڈ کپ کی تیاریوں کا اہم حصہ ہوگی، جہاں نوجوان کھلاڑیوں کو بین الاقوامی سطح پر اپنی صلاحیتوں کے اظہار کا موقع ملے گا۔
واضح رہے کہ پاکستان کرکٹ بورڈ کے ویمنز کرکٹ ڈیپارٹمنٹ نے حال ہی میں کراچی میں ویمنز انڈر 19 کھلاڑیوں کے لیے ایک خصوصی تربیتی کیمپ کا انعقاد کیا تھا، جس کا مقصد قومی ٹیم کے ممکنہ کھلاڑیوں کو مستقبل کے بڑے ٹورنامنٹس کے لیے تیار کرنا تھا۔
