راولپنڈی، (ویب اسپورٹس) سہیبزادہ فرحان اور بابراعظم کی 103 رنز کی شاندار شراکت نے پاکستان کو 195 رنز کا مضبوط مجموعہ فراہم کیا، جب کہ عثمان طارق نے کیریئر کے دوسرے ہی ٹی ٹوئنٹی انٹرنیشنل میں زبردست ہیٹ ٹرک کرتے ہوئے زمبابوے کو 126 رنز پر ڈھیر کردیا۔ پاکستان نے ٹرائی نیشن ٹی ٹوئنٹی سیریز کے چوتھے میچ میں 69 رنز سے فتح حاصل کی۔ فرحان نے 63 اور بابراعظم نے 74 رنز کی دلکش اننگز کھیلیں جبکہ فخر زمان نے آخری اوورز میں 27 رنز کی تیز رفتار اننگز سے مجموعہ مزید مستحکم کیا۔
196 رنز کے تعاقب میں زمبابوے کی ابتدا انتہائی خراب رہی اور پاور پلے میں تین وکٹیں گر گئیں۔ سکندر رضا اور ریان برل نے ٹیم کو سنبھالنے کی کوشش کی لیکن 59 کے مجموعے پر نواز نے رضا کو آؤٹ کرکے پاکستان کو بڑی کامیابی دلائی۔ اس کے بعد عثمان طارق نے میچ کا رخ مکمل طور پر پاکستان کی جانب موڑ دیا اور منیونگا، مسیکیوا اور مساکادزا کو مسلسل گیندوں پر آؤٹ کرکے شاندار ہیٹ ٹرک مکمل کی۔ ریان برل 67 رنز کے ساتھ ناٹ آؤٹ رہے لیکن دوسرے اینڈ سے کوئی مدد نہ ملنے کے باعث ٹیم 19 اوورز میں 126 رنز پر آؤٹ ہوگئی۔
پاکستان نے اس کامیابی کے ساتھ مسلسل پانچویں ٹی ٹوئنٹی جیت درج کی اور فائنل میں اپنی جگہ پہلے ہی یقینی بنا چکا ہے۔ ٹیم اب 27 نومبر کو سری لنکا کے خلاف اپنا آخری لیگ میچ کھیلے گی، جبکہ زمبابوے 25 نومبر کو پاکستان کے خلاف اہم مقابلے میں فائنل میں رسائی کی امید برقرار رکھنے کی کوشش کرے گا۔ سکندر رضا نے دو وکٹیں حاصل کیں جبکہ نگاروا اور ایونز کے حصے میں ایک ایک وکٹ آئی۔
