کراچی، (اسٹاف رپورٹر) وزیراعلیٰ سندھ سید مراد علی شاہ نے سندھ کے بارے میں بھارتی وزیرِ دفاع کے حالیہ بیان کو سختی سے مسترد کرتے ہوئے اسے ’’تاریخ سے ناآشنائی‘‘ اور ’’سفارتی طور پر انتہائی غیرذمہ دارانہ‘‘ قرار دیا ہے۔ اپنے سرکاری مؤقف میں وزیر اعلیٰ نے کہا کہ بھارتی وزیر دفاع نہ تو خطے کی تاریخ جانتے ہیں اور نہ ہی حقیقت پسندانہ گفتگو کر رہے ہیں۔
انہوں نے کہا کہ سندھ نے قیامِ پاکستان سے بھی قبل 1936 میں بمبئی پریذیڈنسی سے علیحدگی اختیار کی تھی، جس کے بعد سندھ کے عوام نے ہمیشہ اپنی خودمختاری، وقار اور سیاسی شناخت کو ترجیح دی۔ وزیراعلیٰ سندھ کے مطابق بھارت کی جانب سے سندھ سے متعلق بیانات نہ صرف بے بنیاد ہیں بلکہ تاریخی حقائق کے بھی منافی ہیں۔
مراد علی شاہ نے بھارتی قیادت کو مشورہ دیا کہ وہ پاکستان کے بارے میں ’’دن میں خواب دیکھنے‘‘ کے بجائے اپنی داخلی تقسیم اور مسائل پر توجہ دے۔ انہوں نے دو ٹوک مؤقف اپناتے ہوئے کہا کہ سندھ پاکستان کا اٹوٹ اور ناقابلِ تقسیم حصہ ہے—سندھ کل بھی پاکستان کا حصہ تھا، آج بھی ہے اور ہمیشہ رہے گا۔
