صوبائی وزیر ثقافت، سیاحت، نوادرات و آرکائیوز سید ذوالفقار علی شاہ سے بین الاقوامی شہرت یافتہ صوفی گلوکارہ عابدہ پروین کی ملاقات، سندھ انسٹیٹیوٹ آف میوزک اینڈ پرفارمنس آرٹ جامشورو کے دورے کی دعوت

کراچی، (رپورٹ، ذیشان حسین) صوبائی وزیر ثقافت، سیاحت، نوادرات و آرکائیوز سید ذوالفقار علی شاہ نے بین الاقوامی شہرت یافتہ صوفی گلوکارہ عابدہ پروین سے ملاقات کی اور ثقافت و سیاحت کے فروغ کے لیے سندھ ٹیلنٹ ہنٹ سمیت دیگر امور پر تبادلۂ خیال کیا۔ انھوں نے کہا کہ سندھ کے نوجوانوں میں بے پناہ صلاحیتیں موجود ہیں تاہم انھیں اپنی صلاحیتوں کے اظہار کے لیے ایک حقیقی پلیٹ فارم کی ضرورت ہے جو محکمہ ثقافت و سیاحت سندھ انھیں فراہم کرے گا۔ انھوں نے کہا کہ عالمی شہرت یافتہ لیجنڈ عابدہ پروین پوری دنیا میں پاکستان کی پہچان اور ہماری مہذب قدیم ثقافت کی سفیر ہیں جو بذات خود ایک ادارے کی حیثیت رکھتی ہیں۔ انھوں نے کہا کہ ٹیلنٹ ہنٹ پروگرام میں عابدہ پروین کی موجودگی نوجوانوں کی حوصلہ افزائی کا باعث ہوگی جبکہ ہماری بھی کوشش ہے کہ سندھ میں موجود نیا ٹیلنٹ عابدہ پروین جیسی قدآور فنکارہ سے سیکھ سکے، عابدہ پروین کا ہمارا ساتھ دینا سندھ کیلئے کسی اعزاز سے کم نہیں ہوگا۔ سید ذوالفقار علی شاہ نے عابدہ پرین کو سندھ انسٹیٹیوٹ آف میوزک اینڈ پرفارمنس آرٹ جامشورو کے دورے کی دعوت بھی دی۔ عابدہ پروین نے صوبائی وزیر سید ذوالفقار علی شاہ کوسندھ کی ثقافت کے فروغ کیلئے اپنے مکمل تعاون کی یقین دہانی کروائی اور سندھ انسٹیٹیوٹ آف میوزک اینڈ پرفارمنس جامشورو کے دورے کی دعوت بھی قبول کی۔ انھ نے کہا کہ سید ذوالفقار علی شاہ کی قیادت میں محکمہ ثقافت و سیاحت بہترین کام کررہا ہے او سندھ کی ثقافت کے فروغ کیلئے میری انکی خدمات ہمیشہ موجود ہیں۔ ملاقات میں معروف کمپیئر بخش مہرانوی اور ڈائریکٹر کلچر حبیب اللہ میمن بھی موجود تھے۔