ممبئی، (ویب اسپورٹس) نوی ممبئی کے ڈاکٹر ڈی وائی پاٹل اسٹیڈیم میں کھیلے گئے فائنل میں بھارت نے شاندار کارکردگی کا مظاہرہ کرتے ہوئے جنوبی افریقہ کو 52 رنز سے شکست دے کر آئی سی سی ویمنز کرکٹ ورلڈ کپ 2025 اپنے نام کر لیا یہ بھارتی خواتین ٹیم کا تاریخ ساز پہلا ورلڈ کپ ٹائٹل ہے۔
بھارتی آل راؤنڈر ڈیپتی شرما اور اوپنر شفالی ورما نے بیٹنگ اور بولنگ دونوں میں کمال کارکردگی دکھاتے ہوئے ٹیم کو کامیابی دلائی جنوبی افریقہ نے ٹاس جیت کر پہلے فیلڈنگ کا فیصلہ کیا، تاہم بھارت نے 50 اوورز میں 7 وکٹوں کے نقصان پر 298 رنز کا بڑا مجموعہ بنایا، جو ویمنز ورلڈ کپ فائنل کی تاریخ میں دوسرا سب سے زیادہ اسکور ہے۔
بیٹنگ میں شفالی ورما نے 87 رنز کی دلکش اننگز کھیلتے ہوئے اسمرتی مندھانا (45) کے ساتھ 100 رنز کی شراکت قائم کی۔ ڈیپتی شرما نے 58 رنز کی ذمہ دارانہ اننگز کھیل کر مڈل آرڈر کو سہارا دیا، جبکہ رچا گھوش نے 34 رنز کی جارحانہ اننگز کھیل کر اختتامی اوورز میں ٹیم کو مستحکم اختتام فراہم کیا۔ جنوبی افریقہ کی جانب سے آیابونگا کھاکا سب سے کامیاب بولر رہیں، جنہوں نے 3 وکٹیں حاصل کیں۔
جواب میں جنوبی افریقہ کی ٹیم 299 رنز کے ہدف کے تعاقب میں 246 رنز پر آل آؤٹ ہو گئی۔ کپتان لورا وولوارٹ نے 101 رنز کی شاندار سنچری اسکور کی، مگر ان کی وکٹ گرنے کے بعد ٹیم لڑکھڑا گئی ڈیپتی شرما نے تباہ کن بولنگ کرتے ہوئے 39 رنز کے عوض 5 وکٹیں حاصل کیں، جن میں وولوارٹ اور کلوئی ٹرائن کی قیمتی وکٹیں بھی شامل تھیں شفالی ورما اور سری چارنی نے دو دو وکٹیں لے کر جنوبی افریقہ کی مزاحمت ختم کر دی۔
کپتان ہرمن پریت کور کی شاندار قیادت میں بھارتی ٹیم نے تاریخ رقم کر دی۔ ڈیپتی شرما کی آل راؤنڈ پرفارمنس نے بھارت کو پہلی بار ویمنز ورلڈ کپ کا چیمپئن بنا دیا ایک ایسی کامیابی جو بھارتی ویمنز کرکٹ کی تاریخ میں سنہری حروف سے لکھی جائے گی۔
