کراچی (نوپ نیوز) سندھ انسپکٹر جنرل پولیس سندھ، امجد جاوید سلیمی نے 5 ٹریفک پولیس حکام کو مبینہ طور پر کرپشن میں ملوث ہونے پر معطل کرتے ہوئے ان کے خلاف انکوائری کا حکم جاری کردیا۔ پولیس ترجمان کا کہنا تھا کہ کرپشن کے الزامات پر معطل کیے گئے افسران میں گلزار ہجری کے ڈپٹی سپرنٹنڈنٹ پولیس (ڈی ایس پی) جعفر عباس، ملیر کے ڈی ایس پی امین الرحمن، گلزار ہجری کے سب انسپیکٹر محمد سعید اور 2 کانسٹیبلز شامل ہیں۔صوبائی پولیس چیف نے یہ فیصلہ ٹریفک پولیس کے کراچی ڈپٹی انسپکٹر جنرل کی جانب سے رپورٹ کے موصول ہونے پر لیا۔معطل کیے گئے پولیس اہلکاروں کے خلاف انکوائری انٹرنل اکانٹبلٹی برانچ (آئی اے بی) کی جانب سے کی جائے گی۔واضح رہے کہ آئی جی پی جاوید سلیمی کی جانب سے 9 اگست کو پولیس اہلکاروں کی جانب سے اختیارات کے ناجائز استعمال اور احتساب کے عمل کے لیے آئی اے بی کا قیام عمل میں آیا تھا۔اس برانچ کی قیادت ایڈیشنل انسپیکٹر جنرل پولیس کی جانب سے کی جائے گی۔
