کراچی (رپورٹ: ذیشان حسین) محکمہ صحت سندھ نے صوبے میں پہلی بار ادویات کی ٹیسٹنگ کے بعد اب انجیکشن کی ٹیسٹنگ کی بھی جدید لیب کا آغاز کردیا ہے جس سے عوام مزید مختلف بیماریوں سے محفوظ رہ سکیں گے۔ یہ بات سندھ ڈرگ ٹیسٹنگ لیب کے ڈائریکٹر ڈاکٹر عدنان رضوی نے صحافیوں سے بات چیت کرتے ہوئے کہی۔ انہوں نے کہا کہ محکمہ صحت سندھ کا ایک اور اچھا اقدام ہے کہ سندھ کی واحد ڈرگ ٹیسٹنگ لیب میں پہلی بار انجکشن ٹیسٹنگ سیکشن کا آغاز کردیا۔ ڈاکٹر عدنان رضوی نے کہا کہ انجیکشن ٹیسٹنگ سیکشن کا افتتاح سیکریٹری صحت سعید اعوان نے کہا جہاں پر اب ادویات کے ساتھ انجیکٹ ایبل ٹیسٹ کی بھی سہولت میسر ہوگی۔ انہوں نے کہا کہ انجیکشن ٹیسٹنگ سیکشن میں آٹو کلیوز، انکوبیٹر اور جدید مشینیں بھی نصب کی گئی ہیں۔ انہوں نے کہا کہ گلی محلوں میں بیٹھے ڈاکٹر ہر پہلے شخص کو غیر معیاری انجکشن لگانے کی اطلاعات ہیں۔ ان کا مزید کہنا تھا کہ سندھ بھر میں عوام کو غیر معیاری انجیکشن لگانے والے ڈاکٹر باز آجائیں جبکہ انجکشن بنانے والی کمپنیاں بھی باز رہیں۔
