کراچی، (رپورٹ، ذیشان حسین/اسٹاف رپورٹر) صوبائی وزیر ایکسائز، ٹیکسیشن و نارکوٹکس کنٹرول سندھ مکیش کمار چاولہ کی ہدایت پر صوبے بھر میں منشیات فروشوں اور اسمگلروں کے خلاف کریک ڈاؤن جاری ہے۔ اسی سلسلے میں محکمہ ایکسائز کے نارکوٹکس کنٹرول ونگ روہڑی سرکل نے ایس آئی یو ٹی جیل روڈ روہڑی کے قریب کارروائی کرتے ہوئے ایک سوزوکی کلٹس کار (نمبر ADK-188) کی تلاشی کے دوران 20 کلو گرام اعلیٰ معیار کی چرس برآمد کرلی اور ایک ملزم کو گرفتار کر لیا۔
محکمہ ایکسائز کے مطابق برآمد شدہ چرس اور اسمگلنگ میں استعمال ہونے والی گاڑی کو تحویل میں لے کر ملزم کے خلاف مقدمہ نمبر 05/2026 درج کر لیا گیا ہے، جبکہ مزید تفتیش جاری ہے۔ صوبائی وزیر مکیش کمار چاولہ نے متعلقہ حکام کو ہدایت کی ہے کہ منشیات فروشوں اور اسمگلروں کے خلاف بلاامتیاز کارروائیاں مزید تیز کی جائیں تاکہ صوبے کو منشیات کی لعنت سے پاک کیا جا سکے۔
