کراچی، (رپورٹ، ذیشان حسین/اسٹاف رپورٹر) سائٹ ایسوسی ایشن آف انڈسٹریز میں صنعتکاروں اور بینظیر بھٹو شہید ہیومن ریسورس ریسرچ اینڈ ڈویلپمنٹ بورڈ (BBSHRRDB) کے وفد کے درمیان اہم اجلاس منعقد ہوا، جس میں صنعتی شعبے کی ضروریات کے مطابق فنی تربیت اور ہنر مند افرادی قوت کی تیاری سے متعلق امور پر تبادلہ خیال کیا گیا۔ اجلاس میں ایمپلائرز فیڈریشن آف پاکستان (EFP) کے صدر باقر زیدی، قائم مقام صدر احمد ذوالفقار، سابق صدر کامران اور ایگزیکٹو کمیٹی کے اراکین نے شرکت کی اور وفد کا خیرمقدم کیا۔
اجلاس کے دوران بورڈ کے سینیئر سیکریٹری نے ادارے کے جاری منصوبوں، فنی تربیت اور انسانی وسائل کی ترقی کے پروگراموں پر بریفنگ دی، جبکہ ریجنل ڈائریکٹر انجینئر تیمور علی اور دیگر افسران بھی موجود تھے۔ شرکاء نے صنعتوں کی موجودہ اور مستقبل کی ضروریات کے مطابق تربیتی پروگراموں کو مزید مؤثر بنانے، مطلوبہ مہارتوں کی نشاندہی اور ہنر مند افرادی قوت کی فراہمی کے لیے باہمی تعاون کو فروغ دینے پر اتفاق کیا۔
