قومی ٹیم کی سلیکشن میرٹ پر ہو گی ، باصلاحیت کھلاڑیوں کو ٹیم میں آنے کیلئے انتظار نہیں کرنا پڑے گا ،محسن نقوی

لاہور، (نوپ اسپورٹس) چیئرمین پی سی بی محسن نقوی نے کہا ہے کہ قومی ٹیم کی سلیکشن میرٹ پر ہو گی ، باصلاحیت کھلاڑیوں کو ٹیم میں آنے کے لیے انتظار نہیں کرنا پڑے گا ۔چیئرمین پی سی بی محسن نقوی نے گزشتہ روز پی ایس ایل میں شریک پاکستانی کھلاڑیوں سے ملاقات کی ۔اس موقع پر اپنے خطاب میں انہوں نے کہا کہ اب قومی ٹیم میں تمام کھلاڑی میرٹ پر آئیں گے ، کوچنگ سٹاف کی تقرری کے لیے رابطے میں ہیں اور بہترین دستیاب افراد کو کوچنگ اسٹاف میں تعینات کیا جائے گا۔انہوں نے کہا کہ کسی نے غلط کیا ہے یا صحیح، تنقید نہیں کرنا چاہتا ، ہم سب کا ایک ہی مشن ہے اور وہ ہے جیتنا، ہم جیت سکتے ہیں اور جیت اس وقت ممکن ہے جب سب اکٹھے ہوں ۔
انہوں نے کہا اچھے کھلاڑیوں کو ٹیم میں آنے کے لیے انتظار نہیں کرنا پڑے گا، عمدہ کارکردگی کا مظاہرہ کرنے والے کھلاڑی ہمارے سٹارز ہیں ۔انہوں نے کہا کہ ہر میدان میں نشیب و فراز آتے ہیں ، کارکردگی دکھانے والے کھلاڑیوں کے ساتھ کھڑے ہیں، ہال میں موجود تمام کھلاڑی پاکستانی ٹیم کے لئے کوالیفائی کرتے ہیں۔چیئرمین پی سی بی نے مزید کہا کہ ہمیشہ بڑے مقصد کے لیے قربانی دینا پڑتی ہے، کھلاڑی پہلے پاکستان کو ترجیح دیں۔انہوں نے کہا کھلاڑیوں کے کنٹریکٹ کو مزید بہتر کیا جا سکتا ہے، ہمارا مقصد سیاست کو ختم کرنا ہے اور 11 کھلاڑیوں کو اکٹھا کرنا ہے، ٹیم متحد ہو کر میدان میں اترے گی تو کامیابی ملے گی۔ انہوں نے کہا کہ ہار جیت کھیل کا حصہ ہے ، فائٹ کر کے ہاریں تو غم نہیں ہوتا ، پاکستانی قوم کرکٹ سے محبت کرتی ہے اور لڑ کر ہارنے پر کوئی ندامت نہیں ہوتی۔انہوں نے کہا کرکٹ اکیڈمی کو مزید بہتر بنائیں گے اور اسٹیڈیمز کو اپ گریڈ کریں گے، قذافی سٹیڈیم لاہور اور نیشنل سٹیڈیم کراچی کے قریب فائیو سٹار ہوٹل کے حوالے سے تیاری کی جارہی ہیں ۔انہوں نے کہا کہ میں آپ سب کے لئے ہر وقت حاضر ہوں، کھلاڑی جب چاہیں مجھ سے رابطہ کر سکتے ہیں، میرے دروازے آپ کے لئے ہر وقت کھلے ہیں۔اس موقع پر چیف سلیکٹر وہاب ریاض، چیف آپریٹنگ آفیسر سلمان نصیر اور پی سی بی کے اعلی حکام بھی موجود تھے ۔